Andry RAJOELINA
- Détails
- Catégorie : Andry RAJOELINA
Fangatahan’ny mponinan’Analavory tamiko tamin’ny fotoan’ny fampielezankevitra ny hanavaozana ny tsena teto izay feno loto, mamotaka ary tsy hay ivarotana raha vao avy ny orana.
Ankehitriny tsena vaovao, midadasika amina velarana 11.000 m2 no tokanana eto sy atolotra ny mponina. Ahitana tsena mitafo miisa 3 ary mahazaka mpivarotra 1000 mahery. Misy ihany koa biraon’ny zandarimaria, kianja filalaovana sy fanaovana fampisehoana ary efitrano fidiovana manara-penitra.
Ho hita eto avokoa ireo zavatra rehetra ilaina amin'ny fiainana andavanandro ary tsy ho diso anjara ireo mpamboly sy mpiompy izay afaka hampiasa ity tsena ity hamarotana ny vokatr'izy ireo. Tohanantsika manokana rahateo ireo tantsaha mpamokatra koa notolorana fitaovana izy ireo hahafahany manatsara ny famokarana.
- Détails
- Catégorie : Andry RAJOELINA
Laharam-pahamehana napetraka ny fametrahana ny tany tan-dalàna sy ny fanajana ny zon'olombelona eto amin’ny firenena. Tafiditra tanteraka anatin’izany ny fanorenana ity fonja manaraka ny fenitra iraisam-pirenena eto Imerintsiatosika ity. Fanamby goavana sy dingana lehibe izany satria aman-taonany maro no tsy nisy nijery ny tontolon’ny fonja eto madagasikara.
Iarahantsika mahalala ny zava-misy iainana any anatin’ireny fonja ireny izay tsy nisy fanavaozana nandritra ny taona maro satria dia feno hipoka tanteraka ary tsy voahaja intsony ny zo maha olona. Mihoatra avo telo heny amin’ny tokony ho zakany ny fonja. Mahatratra 29000 ankehitriny ny isan'ny voafonja manerana ny Nosy raha toa ka 11000 no tokony ho zakan’ireo fonja misy eto. Fijaliana tanteraka ny iainan'ny voafonja ka nanapa-kevitra hitondra anjara masoandro ho an’ireo voafonja ny fitondram-panjakana hamerenana ny hasina sy zo maha olona azy ireo.
Hahazaka voafonja miisa hatramin'ny 800 ity fonja vaovao eto Imerintsiatosika ity. Natao hitazomana ireo olona nahavita heloka bevava sy ireo sokajiana ho mampidi-doza ho an'ny fiarahamonina. Ankoatra ireo trano fatorian'ireo voafonja dia misy trano fisakafoanana iombonana, efitra fidiovana sy fivoahana ary indrindra ny "parloirs" natokana hifampiresahan'ireo mpamangy ireo voafonja ny eto. Voaaro sy tsara ambina tanteraka ny faritra rehetra eto amin'ity fonja eto Imerintsiatosika ity ary misy ireo "cameras de surveillance" manara-maso ny anatiny sy ivelany mandritra ny fotoana rehetra izay mahatakatra hatramin’ny 4km manodidina.
Tsy ny eto ihany fa hohavaozina ihany koa ny fomba fitantanana sy fandraharahana eo anivon'ny fonja manerana an'i Madagasikara. Hampianarina sy hampiofanina amin'ny karazana asa amin'ny sehatra samihafa, toy ny fambolena, ireo voafonja.
Mijery lavitra isika, mitsinjo lavitra , mba tsy ho toerana fanasaziana fotsiny ny fonja fa ho toerana hanitsiana ireo diso lalana mba hahafahan'izy ireo miverina ho olom-banona eny anivon’ny fiaraha-monina.
- Détails
- Catégorie : Andry RAJOELINA
Anisan'ireo fotodrafitrasa nangatahan’ny mponina aty amin'ny faritra Itasy ihany koa ireto Tranom-pokonolona eto Miarinarivo sy Analavory ireto.
Nohavaozina tanteraka izy ireo ary samy ahitana efitrano malalaka iray, misy fanamafisam-peo, jiro, fanaka, takelaka famantarana mirehitra sy efitra fidiovana manara-penitra.
Ho fanampiana amin’ny fanatsarana endrika ny tanana dia notolorana fiarabe fandraofana fako ihany koa ny kaomin'i Miarinarivo sy Analavory ho fanadiovana ny tanàna.
- Détails
- Catégorie : Andry RAJOELINA
Mialoha ny hifanandrinan’izy ireo amin’ny ekipam-pirenen’i Bénin dia nanasa ireo Barean’i Madagasikara teto Iavoloha ny tenako ho mariky ny firaisam-po sy firaisan-tsaina.
Mankasitraka ny kintan’ny baolina kitra Samuel Eto’o tonga manohana ny ekipam-pirenentsika. Antenaina fa hamporisika ireo tanora Malagasy mba hikendry ny tsara kokoa hatrany eo amin'ny sehatry ny fanatanjahan-tena izao fahatongavany eto Madagasikara izao.
Manantitra indray ihany koa ny fanohanan’ny Malagasy iray manontolo ny Barea ary mitsodrano azy ireo mba hitondra avo ny voninahi-pirenena, hanoratra pejy vaovao eo amin’ny tantaran’ny fanatanjahantena Malagasy.
- Détails
- Catégorie : Andry RAJOELINA
Melohiko tanteraka ny fisomparana ataon’ny mpikambana sasany ao amin'ny Federasiona Malagasin’ny baolina Kitra - FMF haminganana ny ezaka lehibe ataontsika hanandratana sy hitondrana lavitra ny kitra Malagasy.
Tsy azo leferina ny fingana natao izay nitarika fandrarana ny Malagasy tsy ho afaka hanatrika ny fitokanana ny Kianja BAREA sy hanohana ny ekipam-pirenena Barean’i Madagasikara izay hifanandrina amin'i Bénin amin’ny lalao fifanitsanana hiakarana amin'ny fiadiana ny tompon-daka eran-tanin’ny baolina kitra hotanterahana ny taona 2022. Alalana avy aiza no nahafahan’ny FMF hanoratra any amin’ny CAF hangataka mpijery 1500; hanohitra ny Ministeran’ny Tanora sy Fanatanjahantena izay efa nanoratra tamin’ny FIFA sy ny CAF ny hahafahana hanatrehan’ny mpijery ny lalao no sady hitokanana ny kianja ho an’ny 02 septambra satria efa resy ny COVID-19 eto Madagasikara?
Tsy fanomezana hasina ny Malagasy ny fihetsiky ny FMF, tsy fanomezana hasina ny mpilalao, tsy fanomezana hasina ny taranja baolina kitra koa melohiko ankitsirano.
Mankahery sy mamporisika hatrany ireo mpilalao rehetra sy ny ekipa teknikan’ny BAREA izay niara-dalana tamiko sy nigadona eto Ivato ny ampahany voalohany. Eo anilanareo hatrany ny vahoaka Malagasy iray manontolo. Tsy maintsy mandresy ny Barea ary tsy maintsy ho lasa lavitra. Ny kianja Barea, izay endriky ny firaisankina, dia ho tokanantsika ny asabotsy 04 septambra ho avy izao.
- Détails
- Catégorie : Andry RAJOELINA
Tontosa soa aman-tsara omaly teo amin'ny Kianja BAREA Mahamasina ny lanonana fankalazana ny faha 61 taona niverenan'ny Fahaleovantenan'i Madagasikara.
Lanonana tao anaty filaminana, fitoniana sy fifaliana tanteraka ary indrindra tao anatin'ny fanajana ireo fepetra ara-pahasalamana. Koa dia manantitra ny fisaorana sy fankasitrahana ireo rehetra niara-nisalahy nahalavorary izany ny tenako. Singaniko manokana amin'izany:
-Ny fianakaviamben'ny foloalindahy izay sady nanatanteraka ny Matso no nitandro ny filaminana
-Ireo mpiara-miasa eto anivon'ny Fiadidiana ny Repoblika, ny avy ao amin'ny Komity teknika nasionaly nikarakara ny fanomanana, ny ministeran'ny fiarovam-pirenena, ny fiadidiana ny Tananan'Antananarivo
-Ireo mpanao gazety sy mpikirakira serasera, ny haino amanjerim-panjakana (TVM sy RNM) sy ireo tsy miankina izay niara nifandrimbona tamin'ny fampitana ny fankalazana, ireo teknisiana rehetra, ireo mpanakanto ary ireo rehetra niara-nisalahy tamin'ny fanatontosana iny fankalazana manetriketrika iny
-Farany saingy tsy ny kely indrindra dia ny vahoaka Malagasy rehetra tsivakivolo manerana ny Nosy.
Ao anatin'izao Asaramanitra izao dia nisy ny fanenan-tsazy nomeko na "grâce présidentielle" ho an'ireo rehetra izay voakasik'izany.Ireo foloalindahy rehetra izay nandray anjara tamin'ny Matso ihany koa dia mahazo fialan-tsasatra mandritry ny 24 ora.
Dia mirary soa hatrany antsika rehetra.
